កណ្តាល៖ ត្រីរាជមានទម្ងន់ចំនួន ៤៦គីឡូក្រាម ប្រវែង ១៥៧សង់ទីម៉ែត្រ ដែលចាប់បានកាលពីថ្ងៃទី២៦ ខែធ្នូ ឆ្នាំ២០២២ ត្រូវបានមន្ត្រីរដ្ឋបាលជលផលស្រុកលែងចូលទន្លេមេគង្គវិញ ដោយមានការបំពាក់សញ្ញាសម្គាល់ដើម្បីតាមដានពីការធ្វើចរាចរផ្លាស់ទីរបស់ត្រី។
ត្រីរាជដ៏កម្រនេះ ត្រូវបានអ្នកនេសាទចាប់បានដោយឧបករណ៍ម៉ាញ់នៅក្នុងភូមិស្វាយអាត់លើ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។
ប្រធានវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប លោក ហេង គង់ បានបញ្ជាក់ប្រាប់អង្គភាពសារព័ត៌មាន EAC News នៅថ្ងៃទី២៧ ខែធ្នូនេះថា មុនលែងត្រីរាជដែលចូលក្នុងទន្លេមេគង្គ ក្រុមអ្នកជំនាញបានបំពាក់ស្លាកដើម្បីតាមដានការបន្លាស់ទីរបស់វា។
បើតាមលោក ហេង គង់ ត្រីដ៏កម្រដែលត្រូវបានលែងក្នុងទន្លេមេគង្គ បើកាលណាពលរដ្ឋ និងប្រជានេសាទចាប់បានវិញ គឺត្រូវរាយការណ៍មកមន្ត្រីរដ្ឋបាលជលផលខេត្តដើម្បីត្រួតពិនិត្យ និងលែងវាទៅរស់នៅក្នុងទឹកទន្លេវិញ។ លោកគូសបញ្ជាក់ថា ពលរដ្ឋ ឬប្រជានេសាទដែលចាប់បានត្រីទឹកសាបដ៏ធំ ខាងរដ្ឋបាលជលផលខេត្តនឹងមានការផ្តល់ជាថវិកាលើកទឹកចិត្តមួយចំនួនដែលបានការពារ និងអភិរក្សត្រីទឹកសាប។
លោកបានអំពាវនាវដល់ពលរដ្ឋ និងអ្នកនេសាទប្រសិនជាចាប់បានត្រីដ៏កម្ររបស់កម្ពុជាកុំសម្លាប់ និងបរិភាគ ពោលគឺត្រូវសហការរួមគ្នាថែរក្សាត្រីទឹកសាបដ៏ធំរបស់កម្ពុជា៕
